عيد الاضحى والضحايا

كل سنة وانتم طيبين مع ان العيد خلص ... معلش جت متأخرة ... بس انا كنت محتارة أعيد عليكو وننسى كل المشاكل والهموم ولو في يومين العيد وبعد كده نرجع نفتكرهم تاني ... بصراحة اتكسفت ... سألت نفسي يا ترى أهالي الدويقة هما كمان هيعيدوا وينسوا اللي جرالهم ؟؟
طب وأهل تامر اللي قتله الظابط ... و أمثاله كتير !!
وأهل خالد اللي قتله المدرس ... وبردو في زيه كتير !!
وحادث مقتل بنت الفنانة ليلى غفران وصديقتها بغض النظر عن اللي بيتقال ... بس دول في الاول وفي الآخر بشر
يا ترى الناس دي وغيرهم عيدوا زيّنا ؟؟

بقدم تعازيا لكل أهالي الناس اللي ماتوا نتيجة الفوضى والاهمال والاستهوان بحياة المصري ... فكل شئ اصبح في غلاء إلا المواطن المصري !!

و أخيرا ... انقلاب أتوبيس في المنيا اللي مات فيه اكتر من 60 واحد – لا حول ولا حوة إلا بالله – 60 واحد غرق في ترعة الإبراهيمية ... و 10 بس هما اللي قدروا ينجوا بإصابات .
كان هو وصاحبه ايدهم في ايد بعض تحت الميه ... يطلع واحد ويغرق التاني ... صحيح انه قضاء وقدر ، لكنه شئ يحزن ... المصايب موجودة في كل البلاد ... انما الانسان مش رخيص في كل البلاد .
مهما عبرنا عن حزننا ... ومهما اتأثرنا ... ومهما قولنا ... عمرنا ما هنبقا زي أهل الناس اللي ماتت واللي اتقلت
ربنا يصبرهم ... ويصبر كل واحد على بلواه لحد مانخرج من الامتحان الصعب اللي احنا فيه ده على خير
لكن كل ده مايمنعش ان احنا على الأقل نحلم بفرحة ... ربنا كريم ورحمته واسعة

كل سنة وانتم صابرين